Klabu ya Yanga leo itashuka dimbani kupambana dhidi ya Tanzania Prisons kwenye mechi ya ligi kuu Tanzania Bara katika uwanja wa Azam Complex Chamanzi jijini Dar es Salaam.

Yanga ikipata ushindi leo itaiondoa kileleni Simba ambayo ndiyo inayoongoza msimamo wa ligi kuu Tanzania.

Kocha wa Yanga Mzambia, Lwandamina amesema kuwa amewaandaa wachezaji wake kupambana kwa ajili ya kupata ushindi na kuwasisitiza waongeze umakini katika mchezo wa leo.

Lwandamina amesema hakuna mechi rahisi na amewaambia wachezaji wake wasifikirie ushindi mnono walioupata katika mchezo uliopita.

Mechi nyingine za ligi hiyo ya juu nchini zinazotarajiwa kufanyika leo ni kati ya Mbao FC dhidi ya Mwadui wakati Kagera Sugar wataikaribisha Stand United na Ruvu Shooting watawaalika Majimaji ya Songea.

Simba itashuka dimbani hapo kesho kupambana dhidi ya Lipuli kwenye mechi itakayofanyika katika uwanja wa Uhuru jijini Dar es Salaam.