Muigizaji nyota wa Bongo Movie, Wema Sepetu anatarajia kupandishwa mahakamani kwa tuhuma za kukutwa na bangi katika nyumba anayoishi.

Kamanda wa Polisi kanda maalum ya Dar es Salaam, Kamishina wa Jeshi la Polisi, Simon Sirro amesema kuwa Wema Sepetu na mwenzake Bakari Mcheni watapandishwa kizimbani kwa tuhuma za kukutwa na misokoto ya bangi.

Kamishina Sirro amesema kuwa katika upekuzi uliofanyika Wema alikutwa na bangi pamoja karatasi za kuvutia bangi ‘Lizla’ huku Bakari Mcheni akikutwa na misokoto mitatu ya bangi wakati wa upekuzi.

Pia Kamanda Sirro amesema kuwa watu 10 watapelekwa mahakamani kula kiapo juu ya mwenendo wa kimaadili kutokana na kutumia dawa za kulevya ambapo watatakiwa ndani ya miaka miwili wasitumie dawa hizo na kuripoti polisi mara mbili kwa mwezi.

Watu waliokamatwa na watakao kula kiapo ni Hamidu Chambuso ‘Nyandu Tozy’, Khalid Mohamed ‘TID’, Rumeo George, Sideo Mwandigo, Johanes Mahsen, Said Masoud ‘Petit Man’, Rajab Salamu, Lulu Salengwa Nasoro pamoja na Bakari kierefu.