Mwanamuziki wa Bongo Fleva, Diamond Platnumz amesema kuwa wasanii watakaoshiriki tamasha la Wasafi Tumewasha linaloandaliwa na Wasafi Media lazima wawe wamesajiliwa na Baraza la Sanaa la Taifa (Basata).

Diamond amesema kuwa ili msanii aweze kujisajili Basata anatakiwa kulipia Sh45,000 fedha ambayo baraza hilo limesema kila msanii anaweza kuimudu.

Tamasha hilo litafanyika Januari 30, 2021 jijini Dar es Salaam katika uwanja wa Uhuru kuanzia saa sita mchana.

Amebainisha kuwa msanii ambaye hajasajiliwa kwa sababu ya kushindwa kumudu gharama za usajili, anaruhusiwa kufanya mazungumzo na Wasafi na watamlipia gharama hizo na kumkata kwenye malipo ya kutumbuiza katika tamasha hilo.

Ofisa sanaa mwandamizi wa wa BASATA, Abel Ndaga amesema gharama za msanii kujisajili ni Sh45,000 na kwamba haiwezi kuwa sababu  ya kushindwa kujisajili.

Diamond amesema kabla ya tamasha hilo kufanyika, Wasafi watafanya kongamano na wasanii kwa ajili ya kuwakutanisha na wataalamu wa sekta ya burudani na sanaa nchini kwa lengo la kupewa elimu namna ya kuwa msanii bora na mwenye ushawishi sokoni.