Rais wa Jamhuri ya Muungano wa Tanzania, Dkt. John Pombe Magufuli amemtaka mkuu wa mkoa mpya Anna Mghwira kuacha kisikiliza maneno ya watu na badala yake kufanya kazi za kuwaletea wananchi maendeleo.

Rais Magufuli ametoa kauli hiyo leo baada ya kumuapisha mkuu wa mkoa huyo katika viwanja vya Ikulu jijini Dar es Salaam.

Rais Magufuli amemtaka mkuu huyo kufanya kazi bila kujali itikadi za vyama vyao vya siasa, dini, makabilia na kanda wanazotoka.

Pia amemuhakikishia ushirikiano wa kutosha wakati wote wa utekelezaji wa majukumu yake na asikubali kuyumbishwa na mtu yeyote katika majukumu yake ya kuwahudumia wananchi.

Kwa upande wake mkuu wa mkoa huyo, Anna Mghwira amemshukuru Rais Magufuli kwa kumuamini na kumteua kuwa Mkuu wa Mkoa wa Kilimanjaro.

Mkuu wa mkoa Anna Mghwira amemuahidi kuwa yupo tayari kwenda kufanya kazi ya kuwatumikia wananchi na kujenga Taifa bila kujali itikadi ya vyama au dini.