Mwanamuziki wa Bongo Fleva, Hamis Mwinjuma a.k.a Mwana FA amesema kuwa kundi la East Coast Team haliwezi kurudi kama zamani ila wanampango wa kufanya kazi ya pamoja.

Mwana FA ambaye anatamba na wimbo wake ‘Dume Suruali’ amesema kuwa kurudi kwa kundi hilo ni vigumu sana kutokana na kubadilika mfumo wa kimaisha pamoja na mfumo wa muziki kwa hiyo ili kurudisha kundi lazima kuwe na mazungumzo mengi sana.

Mwanamuziki huyo ni miongoni mwa wasanii waliokuwa wanaunda kundi la East Coast Team lililokuwa na maskani yake maeneo ya Upanga jijini Dar es Salaam.

East Coast Team ni kundi la muziki wa Bongo Fleva lililopata kufanya vizuri kwenye medali ya Bongo Fleva miaka ya tisini ambapo lilikuwa lina upinzani na wasanii kutoka maeneo ya Temeke jijini Dar es Salaam.

Mbali na Mwana FA wasanii wangine waliokuwa wanaunda kundi hilo ni GK, AY, Snair, O Ten, Sharif, Buff G, Stany Boy na wengine wengi ambapo walitamba na nyimbo kama vile ‘Ama Zangu Ama Zao, Hii Leo na Itikadi.