Mustakabali wa kocha wa Arsenal, Arsene Wenger wa kuondoka au kuendelea kuwa kocha wa klabu hiyo utajulikana mwisho wa msimu huu.

Hayo yanajiri baada ya usiku wa kuamkia leo kufungwa 5-1 na Bayern Munich kwenye mechi ya ligi ya Mabingwa Ulaya katika uwanja wa Allienz Arena nchini Ujerumani.

Licha ya kupoteza mchezo huo wa raundi ya 16 bora hakuna matarajio ya kocha huyo kung’atuka kipindi hiki kabla ya kiangazi.

Wenger mwenye umri wa miaka 67 tayari ameshapewa ofa ya mkataba mpya na klabu hiyo lakini bado hajasaini hadi hivi sasa.

Maamuzi ya kuondoka au kubaki kwa Wenger yatakuwa kati ya yeye mwenyewe na klabu hiyo ya Arsenal.

Kocha huyo ameanza kuifundisha Arsenal toka mwaka 1996 lakini mkataba wake na klabu hiyo utamalizika mwisho wa msimu huu.