Mrembo kutoka Kisiwa cha Reunion, Mrembo, Malaika Salatis kutoka kisiwa cha Reunion ametokea kwenye video tatu za Diamond Platnumz ndani ya miaka miwili.

Malaika alizaliwa na kukulia Reunion ambayo ni sehemu ya Ufaransa, kisiwa hiki kipo kwenye Bahari ya Hindi, Mashariki mwa Madagascar na Kusini Magharibi mwa Mauritius.

Akiwa na umri wa miaka 25, Malaika aliamua kuifukuzia ndoto yake kwa kuhamia Sydney nchini Australia, alipojifunza mengi kuhusu sanaa na sasa anatambulika kama Mwimbaji kitaaluma, Dansa na Mwanamitindo.

Kipindi cha mwaka 2015, haraka Malaika alijiimarisha kama mwanamitindo na dansa na baadaye kufanikiwa kutumbuiza na wasanii mashuhuri kama vile Macklemore, Tiwa Savage na wengine wengi na alionekana kwenye vipindi vya runinga.

Mwaka 2017 Malaika alitafutwa na lebo kubwa, Warner Music Australia na hapa ndipo alianza kujiendeleza kama msanii wa muziki kitaaluma.

Katika tovuti yake anasema anatumai kweli atapaza sauti na kuibua msukumo wa ndani ya mioyo ya kizazi kijacho kupitia maono yake ya kisanii.

Kufika Februari 25, 2020 alitokea kwenye video ya Diamond ‘Jeje’ iliyofanyika Zanzibar, uchezaji wake na umbo lililonyumbulika ulivutia wengi hadi video hiyo kuandika rekodi kama video iliyotazamwa zaidi barani Afrika kwa mwaka 2020.

Ndani ya mwaka huu ametokea kwenye video nyingine ya Diamond, ‘Gidi’ ambayo inabamba sasa, hii imetoka Februari 18, 2022 zikiwa ni siku chache tangu walipotumbuiza pamoja kwenye shoo maalumu iliyoandaliwa na waandaaji wa tuzo za Grammy, Recording Academy ijulikanayo kama Global Spin.