Bondia, Conor McGregor amesema kuwa atampiga mapema mpinzani wake Floyd Mayweather baada ya Mamlaka kuridhia matumizi ya ‘gloves’ laini kwenye pambano lao.

McGregor amesema kuwa kwakuwa gloves zimekuwa laini zaidi basi atakuwa na uwezo wa kumaliza pambano lao ndani ya raundi mbili.

Mbabe huyo aliongeza kuwa yuko tayari kwa pambano la raundi 12 dhidi ya Mayweather lakini anaamini kuna uwezekano mkubwa zaidi wa kulimaliza pambano mapema.

McGregor amezoea kutumia gloves zenye ukubwa wa 4oz kwenye mapambano ya UFC, na Mayweather amewahi kutumia gloves zenye ukubwa wa 8oz kwenye mapambano yake 46 kati ya 49.

Awali, kambi ya Mayweather iliweka masharti kuwa wapiganaji hao watatumia gloves zenye vipimo vya 10oz, lakini Nevada State Athletic Commission (NAC) imeridhia matumizi ya gloves zenye vipimo vya 8oz.

Pambano hilo linalotarajiwa kuvunja rekodi ya kutengeneza kiasi kikubwa zaidi cha fedha litafanyika Agosti 26 mwaka huu nchini Marekani.