Kocha wa Real Madrid Zinedine Zidane amesema timu yake inashindwa kupata matokeo kwasababu imepoteza hali ya kujiamini uwanjani.

”Timu haijiamini tena, tumekosa uwezo huo uwanjani”, amesema Zidane kwenye mahojiano na wanahabari baada ya timu yake kukubali kichapo cha bao 1-0 kutoka kwa Villareal.

Zidane ambaye aliiongoza Real Madrid kuanza msimu kwa kushinda ubingwa wa UEFA Super Cup, Spain Super Cup na klabu bingwa ya dunia ameongeza kuwa wanafanya kila kitu lakini wanashindwa kupata matokeo.

”Timu inacheza vizuri, tunatengeneza nafasi nyingi lakini hatufungi, wachezaji wote hawajiamini, lakini tutaendelea kulifanyia kazi hilo limalizike katika kipindi kifupi sana”, ameongeza.

Mabingwa hao watetezi wa La Liga hivi sasa wanashika nafasi ya 4 kwenye msimamo wa ligi hiyo wakiwa na alama 32, wakizidiwa alama 16 na vinara Barcelona wenye alama 48 kileleni.