Waandaji wa tuzo za BET wamesema kuwa hakuna nafasi ya mashabiki kupiga kura kumchagua mshindi kwenye tuzo bali kuna watu maalum wa kupiga kura kwenye tuzo hizo.

BET hawana mfumo wa mashabiki kupiga kura (popular votes) ili kumpata mshindi, bali kura zinapigwa na akademi yao (BET Awards Voting Academy) yenye watu 500 ambayo tayari wanakuwa wamewachagua wenyewe.

Akademi hii inajumuisha watu mbalimbali wenye uelewa kutoka kwenye muziki, media, bloga, burudani na hata mashabiki ambao hupita katika mchakato maalum kabla ya kutambulika.

BET kupitia tovuti yao hutoa taarifa kuwa wanahitaji wanachama wa kupiga kura kisha wanaambatanisha na fomu ya maswali ambayo anayehitaji kuingia katika hiyo akademi atayajibu.

Maswali yanalenga kupima uelewa wa mwombaji kuhusu burudani na wale watakaojibu vizuri ndio wanaingia katika akademi hii.