Mwanamuziki wa Bongo Fleva, Harmonize ametoa listi mpya ya wasanii watakaopafomu kwenye tamasha lake la Afro East Carnival litakalofanyika Tabata-Shule jijini Dar, mwezi Machi.

Katiki listi hiyo mpya, Harmonize hajawaorodhesha wasanii Jux na Darassa baada ya wawili hao kuteta vikali kwamba Harmonize aliwaorodhesha bila kuwahusisha wala kuzungumza na menejimenti zao.

Jux alimjia juu Harmonize baada ya kubaini kwamba jina lake limeorodheshwa kwenye bango la tamasha hilo bila kutaarifiwa.

“Tafadhali hakikisha kuna makubaliano kati ya uongozi wangu na timu yako kabla ya kuniweka kwenye mabango ya matangazo kama haya. Tunapenda kushirikiana kama wasanii ila taratibu za kiuongozi zifuatwe,” anasema Jux kwenye bango hilo lililopostiwa kwenye Instagram ya Harmonize.

Kwa upande wake, msanii Darassa pia amemjia juu Harmonize kwa ghadhabu kwani alipokea taarifa za jina lake kuonekana kwenye bango hilo kwa mshtuko mkubwa kwa sababu hakuwa ametaarifiwa wala kupewa mwaliko maalum.

“Kama artist, ninaamini kwenye support. Lakini vitu kama hivi lazima tuwe na mawasiliano before kufanya action kama hizi. Kuna ratiba zetu za kazi unaziweka…” Analalama Darassa.

Baada ya hapo, Harmonize imebidi akaliondoa bango hilo kwenye mtandao na baadae akalipakia lingine jipya pasi na majina ya wasanii hao wawili.