Filamu itakayoelezea maisha ya aliyekuwa gwiji wa muziki nchini Marekani 2pac Shakur ‘All Eyez On Me’ inatarajiwa kutoka mwezi Juni mwaka huu.

Demetrius Shipp Jr. ndiye atakayemuigiza Tupac katika filamu na ni movie yake ya kwanza kubwa.

Danai Gurira, kutoka filamu ya the Walking Dead, pia atacheza kama mamake Tupac kwenye filamu hiyo.

Kipande kifupi cha maelezo ya filamu hiyo kinaanza na maneno ‘lazima uwe na msimamo wa kitu fulani, lazima uishi kwa sababu ya kitu fulani, na lazima uwe tayari kufa juu ya kitu fulani’.

Inaonyesha Tupac akiwa katika studio ya kurekodi nyimbo na akiimba mbele ya watu, na dakika chache baadaye kunatokea vurugu la bunduki na kutajwa kwa uchunguzi na idara ya upelelezi FBI.

Wakati wa umaarufu wake hakuwa anasikilizana na marapa wa upande wa East Coast akiwemo Diddy na Notorious B.I.G ambaye pia ni marehemu.

Bali na usanii wake pia alitokea kwa filamu kadhaa ikiwemo filamu ya magenge, na filamu ya mchezo wa vikapu, Above The Rim.

2pac alifariki Septemba mwaka wa 1996 mjini Las Vegas baada ya kupigwa risasi mara nne na watu wasiojulikana.

Alipelekwa hospitali lakini akaaga dunia siku sita baadaye akiwa na umri wa miaka 25 tu kipindi hiko.