Mwanamuziki mkongwe wa Bongo Fleva, Dully Sykes amefunguka na kusema sababu za wasanii wengi kutofanikiwa ni kuendekeza starehe.

Dully amesema zamani walikuwa wanapata fedha japo sio nyingi kama wanazopata wasanii wa sasa lakini walikuwa wanashindwa kufanya vitu vya maana zaidi ya starehe.

“Tulikuwa tunapata fedha ambazo kama tungetumia akili ya kuzidunduliza tungeweza kununua viwanja vitatu hata vinne ambavyo kwa miaka ya sasa ungeweza kuuza hata kimoja tu ukajenga nyumba lakini hatukufanya hivyo zaidi ya kuishia kufanya starehe,” alisema na kuongeza;

“Hata ukifuatilia nyimbo zetu tulizokuwa tunaimba zamani zilikuwa zinahamasisha starehe, kula vizuri na kuvaa vizuri tofauti na sasa ndoto za wasanii wengi ni kujenga nyumba na kumiliki magari mazuri,” alisema.

Dully alisema fedha walizokuwa wanazipata kipindi hicho cha nyuma zilikuwa zinawatosha lakini zilikuwa hazina matumizi sahihi hivyo wakongwe hawatakiwi kuwa na sababu kwamba walikuwa hawapati pesa na kufanya mambo makubwa.