Mwanamuziki wa Bongo Fleva, Diamond Platnumz amesema endapo sheria itamtaka kubadilisha ubini wake anaotumia sasa atafanya hivyo.

Ameyasema hayo ikiwa ni siku chache baada ya Sanura Kassim maarufu mama Dangote ambaye ni mama mzazi wa msanii huyo, kusema baba halisi wa mwanaye ni Salum Iddi Nyange na si Abdul Juma ambaye kwa miaka mingi amekuwa akifahamika kama baba yake.

Baada ya mama yake mzazi kusema hayo Abdul Juma ambaye alikuwa akijulikana kama baba mzazi wa mkali huyo wa bongo flava alimtaka kuacha kutumia jina lake kama ubini.

Akizungumza leo katika mahojiano kupitia kipindi cha The Switch kinachorushwa na Wasafi Fm, Diamond Platnumz amesema suala la kubadilisha jina limekaa kisheria zaidi.

Amesema hata alipojua kuwa mzee Abdul siyo baba yake miaka mingi nyuma hakubadilisha wala kumfanya amchukie kwa sababu ni suala la kawaida.

Alipoulizwa kwanini hajabadilisha hadi sasa alijibu kuwa hakutaka kuleta taharuki ya kubadili jina kwa haraka kwa sababu tangu amezaliwa amekuwa akitumia jina hilo.