Mwanamuziki wa Bongo Fleva, Jay Melody ameweka wazi kusitisha kujihusisha na kuwaandikia mashairi ya muziki wasanii wengine.

Jay Melody amesema kuwa kwasasa hayuko radhi kushiriki katika kuwasindikiza wasanii wengine kwenye utajiri.

Jay Melody anafanya vizuri na wimbo wake mpya ‘Nakupenda’ ameonyesha kujutia kipindi kigumu alichopitia wakati wa kuwatungia mashairi ya muziki wasanii wengine akidai hakunufaika kwa kiwango anachostahili kama mtunzi.

Amesema kuwa msanii anayekuwa ameandikiwa nyimbo kupata mafanikio makubwa, ikiwamo fursa mbali mbali zitokanazo na ukubwa wa nyimbo anazokuwa ametungiwa lakini yeye kama mtungaji anakuwa haambulii kitu.

Kauli ya nyota huyo, inakuja wakati ambao tayari kumekuwepo na mijadala mbali mbali kuhusu mfumo wa mgawanyiko wa faida itokanayo na kazi ya sanaa ya muziki, wenye kuhusisha watunzi ambao mara zote wamekuwa wakitajwa kama miongoni mwa watu wasionufaika na kazi zao.