Baraza la Sanaa la Taifa (Basata) limeweka hadharani majina ya wasanii watakaowania tuzo za muziki ambapo wasanii kutoka Lebo ya WCB chini ya Diamond Platnumz hawapo.

Orodha hiyo imetolewa Jumamosi Machi 19, 2022 na Kaimu Katibu Mtendaji wa Basata, Matiko Mniko na katika orodha hiyo haina msanii hata mmoja kutoka Wasafi.

Matiko amesema wasanii waliotajwa ni waliochujwa kati ya wale walijitokeza kupeleka kazi zao ambapo walikuwa 1360.

Mniko amesema wasanii hao wametajwa kutokana na waliojitokeza kupeleka kazi ambapo kwenye kamati iliyokuwa ina wajumbe 100 iliwachuja na kuona hao ndiyo wanafaa.

“Tulitaka utoaji wa tuzo huu uwe huru, wasanii wenyewe wajipendekeze na wapi wanaona wanawanapaswa kuwa na baada ya mchujo, wateule waliopatikana ndio hao,” amesema Mniko.

Kwa maana hiyo, ni wazi kuwa kukosekana kwa Wasafi kumetokana na wenyewe kutopeleka kazi zao na kutojipendekeza majina yao.

Tuzo hizo zinatarajiwa kutolewa Aprili 1,2022 ambapo vipengele 51 vitawaniwa kwenye tuzo hizo mpya za Tanzania.