Mwanamuziki wa Bongo Fleva, Diamond Platnumz ameachia EP yake yenye nyimbo 10, huku moja ya nyimbo ambayo imeshika chati kwa sasa ni ule wa ‘Nawaza’.

Diamond aliachia rasmi EP hiyo  jana kwa kufanya ‘Listening Party’ na kualika watu wake wa karibu pamoja na mastaa mbalimbali  kuisikiliza kwa mara ya kwanza.
Ndani ya EP hiyo kuna wimbo wa Melody, Somebody, Fine, Mtasubiri, Sona, Loyal, Wonder, Nawaza, Oka na Fresh.

Hata hivyo mpaka sasa  wimbo ambao umeongoza kusikilizwa  na  kukamata namba moja huko YouTube ni ule wa ‘Nawaza’, huku moja ya sababu ikiwa ni namna alivyowaelezea watu maarufu ndani yake akiwemo marehemu Ruge Mutahaba waliyekuwa naye kwenye bifu na hasimu wake katika muziki, Alikiba.

Kwa Ruge ambaye alikuwa mmoja wa watu waliokuwa na mchango mkubwa katika muziki wa Bongo Fleva, Diamond anasema anawaza vipi kama leo angefufuka na kukuta muziki huo ulipofikia.
Kipande hiko kinasema “Nawaza pru mpaka Mecca Ruge amerudi tena je kwa huu mziki  wa sasa sijui nini angesema,”.

Wakati kwa upande wa Alikiba, Diamond amesema “Nilowaza leo nishawaza sana, mi na Kiba ugomvi kipi, nikagundua ni ushamba na ujana wa  kugombania mashabiki,”.

Kwa mstari huo, ni kama Diamond ameamua kuanika sababu kubwa ya  bifu lao ambalo kwa muda mrefu wanapoulizwa kila mtu husema lake.

Pia Diamond kwenye wimbo huo ni kama anataka kuichokonoa ndoa ya msanii maarufu wa filamu, Elizabeth Michae l’Lulu’ kupitia kipande alichoimba ’Nawaza Vanny na Elizabeth clip zao zikivuja ndoa itaimarika eti au ndio ataivunja huku ikidaiwa Elizabeth aliyetajwa ni Lulu .

Hata hivyo kwenye wimbo huo hakuacha kumtaja alaiyewahi kuwa mpenzi wake Wema Sepetu, ambapo amesema kama mpaka leo angekuwa naye hajui kama angekuwa ameshafulia au kupata maeneleo zaidi.
Wengine waliotajwa na baba yake Mzee Nyange na dada maarufu kwenye mitandao, Mange Kimambi.