Msanii wa Bongo Fleva, Tunda Man amedai kuwa kundi la Tip Top Connection limekufa baada ya kufariki aliekuwa meneja wa kundi hilo  marehemu Abdu Bonge.

Tunda Man amefunguka hayo baada ya kuulizwa swali sababu ya kupotea kundi hilo ambalo lilikuwa gumzo sana katika medani ya muziki wa Bongo Fleva nchini kutokana na vibao vyao kuwa vikali.

Tunda Man amesema kuwa kundi hilo lipo lakini alifanyi kazi kama zamani kutokana na kukosekana kwa kiongozi makini wa kuliongoza kundi hilo kama alivyokuwa Abdu Bonge.

Pia Tunda Man amesema kuwa licha ya kundi hilo kuwepo lakini kila mmoja anafanya kazi kimpango wake huku akisema kama yeye tayari ana uongozi wake mwingine unaomsimamia muziki wake mbali na Tip Top.

Tip Top ni kundi lililokuwa na wanamuziki mahiri ambao walijua kuzikonga nyoyo za watu kama vile Madee, MB Dogg, Tunda Man, Kassim Mganga, Pingu na Deso, Dogo Janja na wengine kibao.