Mbunge wa Chalinze  (CCM), Ridhiwani Kikwete amempongeza Fid Q baada ya agizo la Rais John Pombe Magufuli ya kuwataka wasanii wa kike kuvaa vizuri kwenye video zao.

Ridhiwani Kikwete ametoa pongezi hizo baada ya kuiona video mpya ya Fid ‘Fresh Remix’ ambayo ndani yake mabinti wengi ambao wameonekana kwenye video hiyo walikuwa wamevalia magauni marefu ambayo yameonekana kuwasitili na kuwapendeza zaidi bila kuharibu muonekana wa video hiyo.

Ridhwani aliandika “Hii inaitwa tii bila shuruti. Hongera sana mdogo wangu Diamond, Fid Q kwa kuonyesha usikivu. Mavazi mazuri ni yale yanayohifadhi utu na jinsi. Mtoto umleavyo ndivyo akuavyo”.

Rais Magufuli akiwa kwenye Mkutano wa Kamati Kuu ya CCM mwaka jana Disemba 12 aliwataka Jumuiya ya Wazazi ya CCM kutokaa kimya pindi wanapoona mambo mabaya katika jamii.

Pia Rais Magufuli alisema kuwa amekuwa akikerwa na tabia ya baadhi ya wanawake kwenye video za wasanii wa bongo kuvaa vibaya na kuonyesha maumbile yao ya ndani kitu ambacho hakikubaliki.

Kufuatia kauli hiyo ya Rais Magufuli wasanii hawa wakubwa wamenza kuwa mfano kwa kuwavalisha wapambaji wa video yao nguo ndefu ambazo zimesaidia kuipamba video hiyo.