Kiongozi wa National Super Alliance (NASA), Raila Odinga amewataka Rais Kenyatta na naibu wake William Ruto waache kumuita mzee anayepaswa kustaafu siasa.

Odinga amesema atajiuzulu baada ya kuwakomboa Wakenya kutoka kwenye serikali aliyoiita ya kifisadi ya Jubilee au moyo wake utakapotaka.

Odonga alikwenda mbali zaidi kwa kuwaita wapumbavu na wanaopaswa kupuuzwa wanaohoji kuhusu umri wake.

Alikishambulia Jubilee kuwa kinafanya kila linalowezekana kung’ang’ania madaraka ili kuendeleza ukabila na kuwatesa Wakenya kwa gharama kubwa za maisha ya watu.

Odinga ambaye alijitoa katika uchaguzi wa marudio wa urais wa Oktoba 26, alisema NASA ni chama pekee cha siasa chenye suluhu ya matatizo yanayowakabili Wakenya.

Awali akiwa kanisani katika kitongoji hicho hicho, Odinga alilaani machafuko yaliyoibuka eneo hilo na kusababisha vifo vya watu watatu Ijumaa iliyopita.

Katika tukio hilo, makundi mawili pinzani yalipambana katika eneo hilo huku taarifa kutoka kwa wenyeji wa eneo hilo zikieleza kuwa kundi lililoharamishwa la Mungiki lilitumwa na wanasiasa kuwasumbua wakazi wa Kawangware wanaohesabiwa kuwa ngome ya upinzani.