Rais wa Gambia, Adama Barrow amesema kuwa nchi hiyo haitajiondoa kutoka mahakama ya kimataifa ya makosa ya jinai, (ICC).

Barrow amebadili uamuzi wa mtangulizi wake Yahya Jammeh, ambaye alikuwa anapinga mahakama hiyo, huku akiitaja kama mahakama ya kimataifa inayoendesha hukumu zake kwa misingi ya ubaguzi wa rangi hasa ikiwahukumu tu waafrika.

Rais huyo amesema hayo, baada ya kukutana kamishena wa tume ya ushiriikiano na maendeleo ya jumuia ya mataifa ya bara Ulaya, Neven Mimica, katika mji mkuu, Banjul.

Barrow alishinda uchaguzi mkuu wa Disemba 1, 2016, kwa ahadi ya kupigania haki za binadamu na uhuru, na kumaliza unyanyasaji ambao raia wa Gambia wamepitia wakati wa utawala wa miaka 22 wa Bw Jammeh.

Naye mwaandishi mmoja wa habari wa Uingereza nchini Gambia, ameandika katika mtandao wake wa Twitter kuwa Jumuia ya bara Ulaya, imeahidi kuzidisha mara dufu msaada wake kwa taifa hilo dogo la Afrika Magharibi.